Meryl Streep i përgjigjet ashpër Lagerfeld: Po pres ndjesë publike

Aktorja e njohur e çmimeve Oscar iu kundërpërgjigj ashpër dizenjatorit Karl Lagerfeld për akuzat se ajo kishte kërkuar para për të veshur fustanin e tij. Dy ditë pas WWD publikoi një intervistë të drejtorit kreativ të Chanel, në të cilën ai akuzoi yllin e “Florence Foster Jenkins”, se, me gjasë, dëshironte të përfitonte një kompensim financiar për të veshur fustanin e tij, aktorja ka reaguar në një deklaratë zyrtare për E! News.

“Në lidhje me “deklaratën” e zotit Lagerfeld nuk ka asnjë polemikë. Karl Lagerfeld, një stilist i njohur, në një medie të rëndësishme, shpifi ndaj meje, ndaj stilistit tim dhe dizenjatorit të fustanit që unë zgjodha të vesh”, – thuhet në deklaratën e aktores.

“Media e printoi këtë shpifje pa e verifikuar. Më pas, artikulli u shpërnda globalisht dhe vazhdon të shpërndahet duke njollosur pamjen time në ceremoninë e Oscar­, me rastin e nominimit të rekordit tim, për të 20-­ën herë, por dhe për të eklipsuar këtë vlerësim në sy të medias, kolegëve dhe audiencës sime. Nuk mund ta marr kaq lehtë këtë, dhe “deklarata” e përgjithshme e Karl Lagerfeld në shenjë pendese për këtë “debat” nuk ishte ndjesë. Ai gënjeu, e printoi gënjeshtrën dhe unë jam ende në pritje”,- thuhet më tej në deklaratën e aktores së famshme.

Streep, në fakt, i referohet deklaratës që Karl Lagerfeld publikoi të shtunën përmes WWD, si për të sqaruar komentet e tij të mëparshme: “Chanel bisedoi me stilistin e zonjës Streep, me kërkesë të saj, për të dizenjuar një fustan për të në Akademinë e Ҫmimeve Oscar. Pas një bisede joformale, unë u keqkuptova duke menduar që zonja Streep kishte zgjedhur një dizenjator tjetër për arsye shpërblimi, gjë që ekipi i zonjës Streep konfirmoi se nuk është e vërtetë. Më vjen keq për këtë debat dhe i uroj më të mirat zonjës Streep në nominimin e saj të 20-të”, thuhet në deklaratën e Lagerfeld­it.

Në intervistën e parë, Lagerfeld pretendoi se stafi i tij kishte nisur të dizenjonte një fustan gri të mëndafshtë dhe pastaj i erdhi urdhër për ta anuluar. Dikush nga stafi i aktores i kishte kërkuar që të mos vazhdonte, sepse “kishin gjetur dikë që do t’i paguante”, deklaratë për të cilën stafi i aktores tha se nuk është e vërtetë: “Zonja Streep nuk do të vishte KURRË asgjë në këmbim të pagesës.”