Pas mbledhjes së Asamblesë së Partisë Socialiste një ditë më parë, kryeministri Rama tha se në datën 25 mars mazhoranca do të zyrtarizojë kandidatët për zgjedhjet lokale. Saranda ka gjasa të jetë një prej atyre bashkive ku socialistët nuk do të rikandidojnë kryetarin aktual, Adrian Gurma.
Muajt e fundit ka dalë në skenë një emër tjetër si i përzgjedhuri për t’u përballur me rivalin e opozitës. Ai është Oltion Çaçi, një sipërmarrës i njohur në sektorin e turizmit në zonën e Golemit, por me një biznes hotelerie edhe në Sarandë. Me origjinë nga babai është nga fshati Dragot i Tepelenës ndërsa nga nëna nga fshati Sopik i Finiqit. Vijimësisht ka qenë prezent në media sa herë flitej për turizmin.
Me Sarandën nuk është se ka një lidhje lineare gjatë gjithë vitit, me përjashtim të muajve të sezonit turistik, megjithatë kjo mbetet për t’u parë nëse do t’i përkthehet si disavantazh në zgjedhje apo jo. Duket se përzgjedhja e tij është bërë personalisht nga Blendi Klosi, drejtuesi politik i socialistëve në qarkun Vlorë. Diçka të tillë e pati paralajmëruar muaj më parë edhe gazetari Endri Xhafo gjatë një debati televiziv. Ende nuk dihet si do të pritet nga strukturat e PS në Sarandë kandidimi i Oltion Çaçit.
Afërmendsh që një pjesë e tyre preferojnë edhe Adrian Gurmën. Por në raste të tilla dihet se kur emri vjen nga “lart”, baza poshtë është e pafuqishme për ta kundërshtuar. Mënjanimi i Adrian Gurmës ngre pikëpyetje e mbase ai vetë do duhet të japë një shpjegim publik nëse nuk zyrtarizohet më 25 mars. Hamendësimet janë të shumta, sa nga ato që lidhen me përplasjen me deputetët dhe kupolën e PS e deri tek performanca e tij përgjatë këtyre katër viteve. Avantazh i Çaçit përveç faktit se garon me një logo të fortë e parti të organizuar si PS-ja, është edhe fakti se përballë opozita është e përçarë. PD e vulës kandidon Skënder Muçon, PD e Foltores kandidon Ardit Cikulin. ©argjirolajm.net
