Kryeministri ka firmosur largimet e para të drejtorëve të mëdhenj të administratës shtetërore, duke nisur një ripërtëritje të saj në nisje të mandatit të tretë qeverisës. Lëvizjet e para të këtij mandati do të ishin drejtorët e mëdhenj në nivel qendror, rajonal dhe bashkiak. Ish-zv.ministri i Infrastrukturës, Hantin Bonati, është emëruar në krye të Albcontrol, duke zëvendësuar Mina Kustën. Vetëm pak ditë më parë Bonati u lirua nga detyra me një vendim qeverie si zv.ministër i Infrastrukturës dhe Energjisë.
Bonati e mbante detyrën si zv.ministër i MIE që nga tetori i vitit 2017. Ndërsa Ergys Verdho është shkarkuar si kreu i ARRSH-së dhe është emëruar drejtor i KESH-it. Verdho zëvendësoi Benet Becin, i cili u zgjodh deputet i qarkut të Shkodrës. Në krye të Autoritetit Rrugor Shqiptar është emëruar Evis Berberi. Pritet që lëvizjet të vijojnë duke kulmuar në fund të verës me kompozimin e qeverisë së re të maxhorancës në mandatin e tretë të saj. Pjesë e administratës së re, përveç lëvizjeve qarkulluese si këto të fundit, pritet të jenë dhe të rinj të spikatur jashtë dhe brenda vendit, të cilët kanë aplikuar në platformën “Gati për Shqipërinë”, të hapur nga Kryeministri Rama e me të cilët zhvilloi dhe një seancë dëgjimore online për të spikatur disa prej tyre.
LËVIZJET
Burime nga Partia Socialiste thanë pak ditë më parë se në sitën e luftës antikorrupsion do të kalojnë të gjithë drejtorët dhe procedurat tenderuese që janë zhvilluar në institucionet publike të vendit. Të njëjtat burime thanë për gazetën “Panorama” se reforma në administratën publike do të sjellë njerëz të rinj në krye të institucioneve në nivel qendror, rajonal dhe vendor. Disa lëvizje të detyrueshme pritet të bëhen edhe për shkak të zgjedhjes si deputetë të drejtuesve të enteve të rëndësishme publike, lëvizje do të ketë edhe në drejtori të tjera. Ajet Zyberi zuri vendin e drejtoreshës së Inspektoratit Kombëtar të Mbrojtjes së Territorit, Dallëndyshe Bici, e cila u emërua dy javë më parë zv.ministre e Mbrojtjes. Por mësohet se lëvizjet do të prekin dhe tatimet e doganat, por dhe agjenci të rëndësishme shtetërore. Përtëritja e drejtuesve kryesorë të administratës publike pritet të bëhet nga kabineti aktual, ndërsa Kryeministri u shpreh dy ditë më parë se qeveria e re do të duhet të krijohet pas sezonit veror.
Kryetari i grupit parlamentar socialist, Taulant Balla, tha gjatë fjalës së tij në Parlament se do të largohen të gjithë ata punonjës të administratës të korruptuar, të cilët nuk u kanë dhënë shërbime qytetarëve. “Ne e kemi thënë shpeshherë në sallën e Kuvendit se për Partinë Socialiste të Shqipërisë edhe në këtë mandat të ri beteja kryesore është beteja për të çliruar zyrat e shtetit nga individët e korruptuar, të cilët marrin ryshfet në këmbim të një shërbimi publik. Mandati i tretë do t’i japë një goditje shumë herë më të fortë çdo zyrtari të pandreqshëm, i cili nuk e ofron shërbimin publik si duhet”, tha Balla dje në Kuvend.
Ai shtoi se do të rishihen të gjitha procedurat tenderuese që janë zhvilluar në institucionet publike. “Kundërshtari më i madh i Partisë Socialiste edhe në këto zgjedhje nuk ishte as Monika e as Luli, por ata zyrtarë shteti të cilët me pa- përgjegjshmërinë e tyre nuk ua kanë dhënë shërbimet si duhet qytetarëve shqiptarë. Transformimi i plotë i administratës së shtetit në shërbim të plotë dhe transparent ndaj qytetarëve, garantimi që çdo qindarkë publike të investohet me cilësi, është sfida jonë. Ne duhet të rishikojmë të gjitha procedurat e tenderëve publikë në këtë vend, në mënyrë që çdo qindarkë të shkojë tek investimi publik”, tha Balla./panorama
