Një grua 34-vjeçare nga Ukraina rrëfen se ka kaluar natën në bodrumin e pallatit të saj me rreth 35 banorë të tjerë. “Ne ishim me fat mbrëmë. Një shpërthim goditi rrugën pranë pallatit tonë, por nuk na qëlloi,” tha ajo.
“Më vonë morëm vesh se dy këmbësorë ishin vrarë dhe një tjetër ishte plagosur. Vala e shpërthimit ishte aq e fortë saqë mu shurdhuan veshët edhe pse isha në bodrum. Pak para shpërthimit fqinji ynë poshtë në bodrum po udhëzonte dy fëmijët e tyre të vegjël tre ose katër vjeç se çfarë të bënin nëse do të kishte një shpërthim.
Të dëgjoja këtë ishte e tmerrshme.Gjatë gjithë natës një vajzë e re zgjonte mamanë e saj. Ajo rrinte ulur duke qarë duke bërtitur dhe i thoshte: “Mami, kam frikë, të lutem më shpëto, më shpëto tani”, u shpreh 34-vjeçarja për BBC.
Megjithatë ajo tha se edhe pse forcat ukrainase morën sërish nën kontroll Kharkivin, ajo vazhdon të dëgjojë shpërthim, dhe thotë se ka frikë se ofensiva ruse është duke vazhduar në qytet.
“Vullnetarët e ushtrisë rezervë po bëjnë një punë të madhe,” tha ajo. Më herët, presidenti ukrainas Volodymyr Zelensky konfirmoi se negociatat mes Kievit dhe Moskës do të zhvillohen në kufirin Bjellorusi-Ukrainë.
Një deklaratë nga zyra e presidentit ukrainas, mësohet se dy delegacionet do të takohen “pa parakushte” pranë lumit Pripyat, raporton SkyNews.
Kyiv Indipendent raporton duke iu referuar burimeve nga qeveria ukrainase se Presidenti Zelensky ka patur një telefonatë me homologun bjellorus Lukashenko, i cili e ka ftuar për negociata në kufirin mes Bjellorusisë dhe Ukrainës.
Sipas medias ukrainase, Lukashenko ka premtuar që nga vendi i tij nuk do të niset asnjë sulm ndaj Ukrainës përgjatë kohës që liderët e saj do të jenë aty duke negociuar.
“Alexander Lukashenko ka marrë përgjegjësinë për të siguruar që të gjithë avionët, helikopterët dhe raketat e stacionuara në territorin Bjellorusi të qëndrojnë në terren gjatë udhëtimit, bisedimeve dhe kthimit të delegacionit ukrainas”, thuhet në deklaratë.
Më herët, Zelenskyy kishte refuzuar që Ukraina të takohej me delegacionin rus në Bjellorusi.
