Presidenti i Republikës, Bajram Begaj mbajti ceremoninë e pritjes së përfaqësuesve të Trupit Diplomatik në Shqipëri. Gjatë fjalës së tij u shpreh se shqiptarët janë një popull me shumë cilësi dhe se çdo mirëkuptimi i përgjigjen me mirëkuptim. Presidenti ka folur aty edhe për agresionin rus në Ukrainë duke i bërë thirrje Putinit në këtë rast t’i vëjë gishtin kokës.
“Shqipëria mbetet vendosmërisht në krah të ukrainasve, e aktivisht pjesë e bashkëpunëtore e aleancës euroatlantike. Shpresa jonë është që konflikti të marrë fund dhe agresori të zërë mend, duke kuptuar se kemi mjaft sfida për të përballuar globalisht, dhe luftërat e hapura të integritetit të vendeve e popujve nuk duhet të jenë pjesë e këtyre sfidave,” tha në fjalën e tij Presidenti.
