Koleksioni i këpucëve i Jennifer Lopez nga Giuseppe Zanotti zyrtarisht është gati dhe rezultati duket se është më shumë “J.Lo” se çduhet. Kapsula e përbërë prej 6 modelesh përfshin sandalet gladiatorë në lartësinë mbi gju, sandale me rripa tek kyçi i këmbës dhe dy palë atlete me platformë ortopedike. Bashkëpunimi i dizajnerit dhe këngëtares, të cilin mund ta gjeni lehtësisht me hashtagun #GiuseppexJennifer shenjon bashkëpunimin e parë pasi J.Lo është njohur prej vitesh si fansa më e madhe e këpucëve të dizajnerit.
“Me Giuseppen ne krijuam një koleksion modern e femëror, me taka të larta seksi dhe atlete të një mode që ende nuk është bërë tendencë. Siç pritej, i kemi shtuar edhe dozën e duhur të shkëlqimit.. ” – shprehet J.Lo për projektin më të ri në fushën e modës. Secili nga 6 modelet vjen në ngjyra dhe materiale të ndryshme, nga pastelet e deri tek lëkura e gjarprit e kamoshi. Më interesantet e koleksionit janë atletet me platformë të disponueshme në ngjyrën gri dhe blu marinë, të personalizuara me gurë kristali për të mos harruar që këtu është “dora” e J.Lo-së.
Pas ringjalljes së Adidas dhe Puma-s ishte momenti të vinte diçka e re dhe mesa duket trendi është shumë afër për tu rikthyer edhe njëherë tek atletet, por këtë herë tek ato më takë! Kjo ngelet për t’u parë.. vetëm koha dhe J.Lo do e tregojë..
