Nuk ka asnjë surprizë sa i takon vendit të parë në klasifikimin e vendeve që eksportojnë më shumë futbollistë në botë. Brazili është para të tjerëve, i shkëputur bindshëm, pas tij vjen Franca dhe podi kompletohet me Argjentinën. Në këtë klasifikim special të CIES (Qendra Ndërkombëtare e Studimit për Sportin), përfshihen të gjithë vendet, edhe Shqipëria, që qëndron pas Kosovës.
CIES ka mbledhur të dhënat për futbollistët e nivelit profesionist, të cilët gjatë vitit kalendarik 2019 kanë luajtur jashtë vendit të tyre. Brazili është i pari, me 1600 lojtarë të eksportuar, nga të cilët 74.6% luajnë në nivelin elitar me skuadrat e tyre. Në vend të dytë është Franca, me 1027 futbollistë të shpërndarë jashtë kufijve të saj, 74% në nivel elitar. Më pas vjen Argjentina, me 972 futbollistë dhe 75.5% në nivel elitar.
Në total, 186 vende kanë të paktën një lojtar që luan në 141 kampionate të përfshira në këtë studim. Brazili, Franca dhe Argjentina përbëjnë 1/4-ën e lojtarëve në futbollin global 22.5%. Nigeria është vendi afrikan që eksperton më shumë futbollistë (399), ndërsa në Azi vendin e parë e zë Japonia (161). Portugalia është destinacioni kryesor për brazilianët, përpara Italisë dhe Japonisë. Tre destinacionet kryesore për francezët janë Anglia, Belgjika dhe Luksemburgu, ndërsa argjentinasit preferojnë kryesisht Kilin, Meksikën dhe Spanjën.
Po Shqipëria? Vendi ynë për vitin 2019 ka eksportuar 38 futbollistë, nga të cilët 73.7% kanë luajtur në nivel elitar me klubet e tyre, pra në kategoritë superiore. Kosova qëndron më lart në klasifikim, me 43 lojtarë të shpërndarë në botë, 5 më shumë se Shqipëria. Kosova mban vendin e 69-të në këtë renditje, kurse Shqipëria vendin e 73-të. Nga vendet e Ballkanit, Shqipëria zë vendin e fundit për lojtarët që çon jashtë kufijve të saj.
