Rruga e asfaltuar, e zgjeruar dhe me dy korsi ndarëse anash do të jepet me koncesion nga fshati Lekaj deri në Fier. Koncesioni është fituar nga kompania, fusha e cila premton se do të investojë 320 milionë euro për 35 vjet dhe më pas do të krijohen të ardhura prej 1.3 miliard eurosh nga vendosja e traut. Çdo mjet që do të kalojë në këtë rrugë, e vetmja, duhet të paguajë. Për të garantuar fitimet e koncesionarit, qeveria ka vendosur vitet e para një garanci nga shteti.
Kompania “Fusha” dhe bashkimi i disa kompanive të tjera ishte oferta e vetme për këtë garë. Ndërhyrja e koncesionarit do të ndahet në dy seksione, Luz i Vogël-Rrogozhinë dhe Rrogozhinë-fillimi i bypassit të Fierit. Në dokument, parashikohet që autostradës aktuale t’i shtohet korsia emergjencës si dhe mbikalime në udhëkryqet ekzistuese. Gjithashtu, do të ndërtohen pesë kryqëzime të reja me nivele të ndara për të zëvendësuar disa nga ato ekzistuese. Koncesionari gjithashtu do të duhet të kryejë mirëmbajtjen e rrugës çdo 10 vite parashikojnë dokumentet.
Për këto shtesa, në rrugën tashmë të ndërtuar dhe në funksion, koncesionari do t’i tregojë shtetit një faturë 320 milionë euro, e cila bashkë me interesat do të zbritet nga të ardhurat para se të nisë pagimi i tatim fitimit. Një skemë e ngjashme ka ndodhur më parë me koncesionin më të madh të nafës. Koncesionari i rrugës do t’i vendoset një tra, ku pagesa minimale do të fillojë nga 2.1 euro për automjetet dhe që vjen me rritje për mjetet e tjera, si furgon, autobus apo kamion. Shteti do vendosë garanci për të siguruar fitimet e koncesioanrit, ndërsa kjo garanci është më e vogël se ajo e Thumanë-Kashar pasi rruga parashikohet të marrë edhe trafikun e kryeqytetit drejt jugut.
Koncesionari duhet të ndërtojë mbikalime dhe nënkalime për të evituar rrethrrotullimet aktuale dhe ta plotësojë këtë rrugë deri në Fier. Vlen të theksohet se kjo rrugë në disa segmente të saj është e sapo ndërtuar, ndërsa e gjithë rruga është e zgjeruar dhe e asfaltuar plotësisht. Ajo që ngre akoma më shumë dyshime është se kjo rrugë është zgjidhja e vetme dhe nuk ka asnjë rruge tjetër paralele dhe që duhet të jetë pa pagesë. Taksapaguesit shqiptarë e kanë paguar njëherë këtë rrugë kur u ndërtua, do e paguajnë edhe njëherë me 320 milionë euro zgjerimin dhe më pas do të paguajnë sërish tarifat për kalimin mbi të./ TCH
