Njësoj si Ervin Bushati, edhe Pandeli Majko do të mbetet jashtë Kuvendit. I renditur i 19 në listën e socialistëve në Tiranë, ai nuk arriti dot të fitonte në këtë pozicion e as të thyente herësin. Majko ka pranuar rezultatin dhe thotë se sistemi është ky që kemi pranuar. Ndërkohë që në Kuvend nga e lista e Tiranës ka hyrë djali i Aqif Rakipit, ish deputetit të PDIU-së. Një i ri te të njëzetat, pa kontribut politik në radhët e PS-së kur e krahason me Pandeli Majkon apo Ervin Bushatin. Ja cfarë shkruan ish-kryeministri i Shqipërisë, Pandeli Majko, dhe njëkohësisht një nga politikanët më të pranuar mes të majtëve e të djathtëve.
“Miq, megjithëse matematika më rendit në 10 kandidaturat e votuara në qarkun e Tiranës, në zgjedhjet e 25 prillit, unë nuk do të jem deputet në Kuvendin e Shqipërisë. Sistemi elektoral është ky që kemi pranuar. Përvoja më ka mësuar se duhet të jesh i gatshëm të shohësh atë që ekziston. Isha i bindur se do ti fitonim 19 mandate në Tiranë. Ndaj fushatën për numrin tim personal 19 e kalova në plan të dytë. Edhe për këtë arsye, rezultati nuk është një përrallë që e mposht me logjikë. Ju falenderoj që votuat për numrin 12, Partinë Socialiste! Sic do të thoshte im atë ndjesë pastë,… “19-ta kërkon leje për tu ulur në aeroport!” Ju jam mirënjohës që më bëtë ky që jam.Shpresoj tu kem dhënë “everything”! Mirupafshim!
Pandi
Tiranë 30 Prill 2021″
