Fundjavën që shkoi pati një ngjarje jo shumë të zakontë në Gjirokastër. Këshilli Bashkiak doli befas jashtë rolit të tij ose mori rolin e munguar të universitetit apo të ndonjë Organizate Jofitimprurëse si ato që gllabërojnë projekte dhe për sy e faqe organizojnë ndonjë work shop. Në këtë rast Këshilli Bashkiak organizoi një konferencë me temë “Turizmi dhe ekoturizmi në rajonin tonë, arritje, sfida dhe perspektiva”.
Referuesit në fakt nuk ishin mendimtarë të mëdhenj apo kërkues që ndoshta mund të kishin bërë ndonjë studim e të kishin ca të dhëna empirike. Folën kryetarët e bashkive të qarkut dhe zëvendësit e tyre, si dhe disa përfaqësues të ftuar nga institucione të tjera. Ranë dakord të gjithë me njëri-tjetrin, siç bëhet zakonisht në të tilla organizime, dhe ikën duke lënë pas nevojën që duhet të kenë një strategji për zhvillimin e turizmit.
Domethënë këta që duhet të bëjnë strategji e politika dhe t’i zbatojnë ato, na tregojnë pse çalon puna. Të kuptohemi, nuk jemi duke thënë se takime të tilla bëjnë keq, qofte dhe kur ato bëhen për të bërë ca qoka. Në fund të fundit janë një mundësi më tepër për të ballafaquar mendime e për të nxitur bashkëpunime. Por kur bëhen nën ombrellën e një organi kolegjial si Këshilli Bashkiak, që nuk është as universitet e as OJF, natyrisht që gjithçka duket e ekzagjeruar.
Këshilli Bashkiak ka totalisht rol tjetër dhe ligji i jep të gjitha mundësitë që në çdonjërën nga mbledhjet të debatojë për çështje të interesit publik në territorin që mbulon. Të shpenzosh qoftë edhe pak para publike, për të bërë botime të fjalimeve të kryetarëve e nënkryetarëve të bashkive të qarkut, në mos delir është me siguri luks i madh që një Zot e di se si ia lejoni vetes. ©argjirolajm.net
