Pas pesë orë ndjekjesh si nëpër filma policia ka arrtur që të gjejë të braktisur pranë grykëderdhjes së Vjosës në Mifol gomonen e dyshuar se po transportonte drogë. Por nga kontrolli rezultoi se në brendësi të saj nuk është gjetur lëndë narkotike. Dyshimet janë se mjeti e ka transportuar drogën drejt Italisë dhe në kthim është pikasur nga policia dhe roja bregdetare. Në bordin e mjetit lundrues ishin tre persona. Qindra forca policore kanë nisur operacionin në një zonë të pyllëzuar, ku mendohet se janë fshehur trafikantët pasi braktisën gomonen në det. Lapsi.al sjell pamje nga operacioni policor.
Njoftimi i policisë
Në vijim të operacionit të kërkimit të mjetit lundrues, shërbimet e Policisë Kufitare, bashkë me DVP Vlorë, Delta Forcë, Rojën Bregdetare dhe Guardia di Finanza, kanë bërë të mundur gjetjen dhe bllokimin e gomones, në brendësi të lumit Vjosë, në afërsi të Mifolit. Nga këqyrja dhe kontrolli i mjetit lundrues nuk është gjetur në bord lëndë narkotike. Shërbimet e Policisë vazhdojnë krehjen e zonës, për identifikimin dhe kapjen e personave që kanë qenë në bordin e këtij mjeti lundrues, si dhe kontrollin në ujërat detare për lëndë narkotike pasi dyshohet se mund ta kenë hedhur në det gjatë ndjekjes nga Policia. Operacioni vijon.
