Ish-drejtoresha e Përgjithshme e Tatimeve, Briseida Shehaj, i është rikthyer politikës pas largimit nga Partia Socialiste. Shehaj, e cila ishte një nga drejtoreshat më të komentuara të qeverisë Rama, edhe për faktin se është vlerësuar me çmimin “Bleta e Artë”, ka treguar mbrëmjen e sotme se është propozuar për tu bërë deputete. Ajo tregoi se propozimi i është bërë nga Lëvizja Socialiste për Integrim, që drejtohet nga Monika Kryemadhi. Ish-drejtoresha e PS-së tha në emisionin “Tempora” në Rtv Ora se ende nuk ka marrë një vendim nëse do ta pranojë ofertën.
“Ka një propozim, por që LSI deri në dhjetor do të kalojë në proces zgjedhjesh dhe më pas do të vendosen se cilët do të jenë kandidatët. Unë kam kënaqësinë që jam propozuar, por ende nuk është marrë një vendim”, deklaroi Shehaj. Ndërkohë emri i ish-drejtoreshës së Tatimeve përmendet së fundi si një kandidate e mundshme e LSI-së në qarkun Gjirokastër, më konkretisht në qytetin e Tepelenës. Briseida Shehaj është me origjinë nga Tepelena dhe ka aktualisht një pjesë të rrethit të saj familjar në këtë qytet.
Pas “dezertimit” të Ediola Brahës në radhët e PS-së, LSI nuk ka ende një kandidate të për Tepelenën. Megjithatë në rast të një kandidimi të mundshëm të Briseida Shehajt në Tepelenë, gjasat që ajo të marrë një mandat duken të pakta për shkak se më favorit është në letër Vangjel Tavo, deputet prej 24 vitesh “pa shkëputje nga puna” në qarkun Gjirokastër. Tavo do të rikandidojë sërish në zgjedhjet e 25 prillit. Megjithatë deri në sa të finalizohen listat do të rrjedhin shumë ujëra.
©argjirolajm.net
