Bashkia Gjirokastër ka investuar rreth 5 milionë lekë të vjetra në banesën e një shtëpie në fshatin Kakodhiq, që jetonte në kushte tejet të vështira. Kryebashkiaku Flamur Golemi ka publikuar një video të banesës si ishte dhe si u transformua teksa shkruan:
“Familja Peci në fshatin Kakodhiq, që deri më sot jetonte në kushte të vështira do të ketë sot e tutje një strehë më të mirë. Falë një vendimi të miratuar në Këshillin Bashkiak, akorduam një fond prej 500 mijë lekësh të reja, për të bërë disa ndërhyrje emergjente në banesën e kësaj familje. Është një kontribut i vogël, por shumë i rëndësishëm për këtë familje e cila ka gjithashtu edhe fëmijë me nevoja të veçanta. Me këtë rast festash ju ftoj edhe ju të ndihmoni me sa të mundeni njerëzit në nevojë, ndani diçka nga vetja juaj me të pamundurit sepse bamirësia nuk ju varfëron asnjëherë. Përkundrazi ju lartëson shpirtin dhe ju pasuron zemrën”