Hetimi për vdekjen e Diego Maradonës vazhdon dhe deklaratat e dëshmitarëve fillojnë të komplikojnë situatën për disa njerëz. Griselda Morel, psikopedagoge e Dieguito Fernando (djalit të legjendës së futbollit), konfirmoi para organeve të drejtësisë se “10” i hidheshin pilula në alkool për ta vënë në gjumë. “Monona (Milagros Rodríguez, kuzhinierja) filloi të na tregonte se, për shembull, një nga kujdestarët ia hidhte pilulat në birrë që të flinte natën. Meqë Diego nuk flinte, kujdestari ia jepte pilulat me kërkesë të vetë Maradonës. Gjithçka ishte kërkesë e tij. Nëse Diego ngrihej në 9 të mëngjesit dhe kërkonte birrë, kujdestarët ia jepnin”, – tha Morel në gjykatë.
Griselda Morel mori pjesë në disa takime midis djalit të Maradonës dhe Verónica Ojeda, të dy në shtëpinë e tij në Brandsen dhe në Buenos Aires. Sipas informacionit të NA, ajo tregoi detajet e asaj që vëzhgoi gjatë atyre vizitave: “Diego nuk donte të priste askënd. Unë mezi e shihja dhe fytyra e tij nuk ishte aq e ënjtur”. Morel kujton diçka që i kishte thënë masazhisti i Maradonës: “Ai nuk ecën shumë dhe mund të shkaktojë edemë kardiopulmonare, pra mund të vdesë”.
Më tej, Morel vijon rrëfimin para hetuesve: “Një të diel, kujdestari po bënte ‘barbecue’ dhe Charly pinte verë me Diegon në tavolinë, gjatë drekës. Veronica priti që Diego të shkonte në banjë dhe sapo mbërriti anesteziologu, i cili i dha një serum magjik. Veronica foli me Charly dhe i tha pse po i jepte verë, sepse nuk lejohej për shëndetin e tij. Ai i tha se ishte vetëm një gotë. Veronica i kujtoi se nuk ishte shoku i saj, por thjesht një punonjës. Shtëpia e Diegos ishte gjithmonë e ndyrë, e neveritshme, e gjitha e çrregullt, frigoriferi ishte në një rrëmujë”.
