Në emisionin “Wake Up” ishte i ftuar aktori shqiptar Ioannis Florian Dine i cili për publikun grek njihet me emrin Ioannis Apergis. Ai ka emigruar nga Gjirokastra bashkë me familjen në Greqi kur ishte vetëm 5 vjeç, kohë për të cilat rrëfeu:
“Ishin kohë shumë të vështira, vetëm një grua na ndihmoi në atë kohë. Nuk tregonim që ishim të huaj, ishim si të izoluar në fillim dhe më pas na mbështetën shumë shqiptarë. Ndërsa përsa i përket racizmit, bullizmit vetëm një herë në shkollë një fëmijë më urinoi çantën dhe më hodhi bankën, duke dëgjuar fjalët që thuheshin në familje për ne shqiptarët, ndërsa sot jemi shokë të ngushtë”, tregon Dine.
Aktualisht Ioannis, Florian Dine është me xhirimet e serialit të famshëm ushtarak, “Parusiaste”, ku Floriani është në rolin e Eltonit, djalit nga Gjirokastra i cili është bërë ndër më të dashurit për publikun grek.
“Me rolin e Eltonit dua të tregoj dhe përmirësoj imazhin e shqiptarëve në Greqi”, u shpreh Dine përgjatë bisedës. Floriani Dine rrëfeu se përpara se të bëhej i njohur dhe i sukseshëm si aktor në teatër i është dashur të bëjë punë nga më të ndryshmet. Ai tregoi se përveç se në kohën e lirë të tij ndihmon babain në ndërtim, më parë ka bërë punë nga më të ndryshmet për të fituar të ardhura. “Kam punuar banakier, kamarier, ndihmës hidraulik…”, tregoi Dine./ TCh
