6 adoleshentë janë nën hetim nga policia e Gjirokastrës pasi rrahën një bashkëmoshatarin e tyre. Fillimisht të rinjtë e rrethojnë shënjestrën e tyre, i tregojnë dicka në celular dhe më pas nisin të qëllojnë në grup.
Edhe pasi ai është rrëzuar kanë vijuar ta gjuajnë me shkelma e grushta. Nga audio e videos dëgjohet edhe i dhunuari teksa i kërkon falje dhe i bën thirrje të ndalojnë. Por dhuna ndaj tij ka vijuar për disa sekonda. Motivet e sherrit nuk dihen ende, por cilado qofshin ato asgjë nuk e justifikon dhunën fizike e verbale ndaj adoleshentit.
“Në përfundim të veprimeve hetimore të kryera në prezencën e prindërve, psikologut dhe avokatit, u proceduan penalisht shtetasit: O. T., 16 vjeç; K. Gj., 18 vjeç; M. R., 17 vjeç; K. M., 17 vjeç; L. K., 16 vjeç dhe K. Q, 17 vjeç, për veprën penale “Plagosja e lehtë me dashje”, e kryer në bashkëpunim. Materialet i kaluan Prokurorisë pranë Gjykatës së Shkallës së Parë Gjirokastër, për veprime të mëtejshme”, sqaron policia në një njoftim për mediat.
Kjo nuk është hera e parë që shfaqen pamje të tilla. Sistemi i vlerave në Shqipëri është përmbysur me kohë dhe modeli i të “fortit” që përdor dhunën për të dominuar është shumë i përhapur edhe në radhët e të rinjve tanë.
