Policia greke ka shkatërruar një bandë të rrezikshme grabitësish në qendër të Athinës. Bëhet fjalë për 22 shqiptarë dhe 4 grekë, të gjithë në moshë të mitur, mëson Top Channel. Sipas policisë greke, banda operonte në zonën e qendrës së Athinës, kryesisht në zonat turistike të Akropolit,Monastirakit, Plakës dhe Ominias.
Deri tani është raportuar zbardhja e dhjetëra grabitjeve që anëtarët e saj kanë kryer ndaj qytetarëve të kryeqytetit helen vetëm gjatë muajve të fundit.
Metodat e bandës ishin shumë të ashpra, madje anëtarët e saj nuk nguronin të përdornin edhe thikat për të trembur viktimat e tyre, raporton TCH.
Në shumicën e rasteve, anëtarët e bandës e rrethonin viktimën,dhe nën kërcënim dhe presion, e detyronin t’ju jepte sendet me vlerë dhe celularët.
Nëse viktima reagonte, atëherë rrihej barbarisht madje në disa raste viktimat e dhunuara u dërguan në spital me plagë të rënda.
Ata akuzohen edhe për trafik lëndësh narkotike. Të gjithë do të dërgohen në gjykatë për masë sigurie.
Ndërkohë autoritet vendase u bëjnë thirrje prindërve të bëjnë kujdes lidhur me sjelljen agresive të të miturve dhe të raportojnë rastet e dyshuar se fëmijët e tyre janë bërë pjesë e bandave me qëllim për të parandaluar ngjarje edhe më të rënda kriminale.
Vetëm vitin e fundit sidomos mbas shpërthimit të pandemisë covid 19, janë shtuar ndjeshëm krimet e të miturve në vend, përkundër krimeve të të rriturve që kanë pësuar një rënie me më shumë se 12%.
