Edi Rama inspektoi sot paradite ambientet e ish Universitetit ‘Kristal’, që pritet të shndërrohen një spital të gatshëm për pritjen e pacientëve të mundshëm të infektuar me Covid-19 në vendin tonë. Rama i la afat ministres së Shëndetësisë, Manastirliu, që punimet të mbarojnë pas 30 ditësh. Ndërkohë një zgjidhje tjetër, për aq sa mund të quhet e tillë, i ka ardhur Kryeministrit nga jugu i vendit. Kryetari i PD Gjirokastër, Dasho Aliko, në deklaratën e sotme për mediat, është shprehur se është i gatshëm të vërë në dispozicion një pronën e tij, që mund të shërbejë si karantinë për të sëmurët e mundshëm me Covid-19.
“Për t’i paraprirë përshkallëzimit të situatës së mundshme, unë si kreu i PD Gjirokastër, vë në dispozicion hapësirën e ish UMB Gjirokastër që është pronë imja për të shërbyer si vend karantinimi për personat që mund të bëhen bartës së Covid-19 dhe që kërkojnë trajtim spitalor. PD Gjirokastër unë personalisht si kryetar i PD së bashku me kreun e Grupit të Punës ish deputetin e PD së Qarkut Prof.Dr Tritan Shehu, jemi të hapur për të bashkëpunuar me faktorët relevantë vendorë për të ndihmuar sa më shumë me qëllim që Qarku i Gjirokastrës të menaxhojë më maksimum situatën e krijuar si pasojë e pandemisë globale. Për ne shëndeti i qytetarëve është prioritar”, është shprehur Dasho Aliko.
Për momentin Gjirokastra është një ndër dy qarqet, bashkë me Dibrën, që s’kanë ende asnjë të infektuar me koronavirus. Të shpresojmë se nuk do të ketë fare!
©argjirolajm.net
