Prej disa kohësh televizioni Alpo në Gjirokastër, i kontrolluar prej LSI-së, transmeton në edicionet e lajmeve kronika për Libohovën, ku dukshëm bën përshtypje këndi tejet kritik i trajtimit të lajmit.
Kjo do të konsiderohet krejt normale, nëse do të kishim të bënim thjesht me një media të pavarur, roli i së cilës është t’i shërbejë publikut dhe jo një pushteti të caktuar.
Por fakti që Alpo Tv është në duart e LSI-së prej disa muajsh, me qëllim që të përdoret për fushatën e 18 qershorit, e kompromenton shumë raportimin e këtij televizioni. Vetëm gjatë edicionit të sotëm të lajmeve, Alpo Tv kishte dy kronika “kundër” kryebashkiakes së Libohovës Luiza Mandi dhe ministres së Kulturës, Mirela Kumbaro. Kronika e parë trajtonte problemin e papunësisë në Libohovë. Për të njëjtin problem ky televizion kishte raportuar rreth dy muaj më parë.
Trajtonte sërish papunësinë në Libohovë, a thua nuk ekziston ky problem fjala vjen në Gjirokastër apo njësitë e saj administrative, të cilat qeverisen nga kryebashkiakja Zamira Rami.
Kronika e dytë lidhej me shtëpinë e lindjes së Avni Rustemit në lagjen “Marinë”, shtëpi që ka nevojë për restaurim prej shumë vitesh dhe deri më tani nuk është bërë ndërhyrje. Ndërkohë që pak muaj më parë, Ministria e Kulturës kësaj shtëpie i dha statusin “monument kulture” dhe përfundoi projektin për restaurimin e saj. Raportimi i Alpo Tv ishte qartësisht një kronikë “porosi” kundër ministres Mirela Kumbaro, e cila pritet të jetë kandidate për deputete e socialistëve në qarkun Gjirokastër.
Thënë kjo, duket se Alpo Tv është pozicionuar qartë kundër PS-së dhe drejtuesve të saj vendorë apo kandidatëve për deputetë në qarkun Gjirokastër. Ndërsa institucionet e drejtuara prej LSI-së, përfshi këtu edhe Bashkinë Gjirokastër, nuk preken.
Raportimet për to janë të mbushura shpesh me elozhe e në shumë raste ngjasojnë me kronikat e dikurshme të RTSH-së për partinë dhe udhëheqjen komuniste. Sidoqoftë muajt e ardhshëm do të tregojnë më shumë rreth këtij sulmi underground që LSI po i bën socialistëve në Gjirokastër. Kujtojmë këtu që pak javë më parë vetë deputeti Vangjel Tavo sulmoi ashpër drejtuesit e policisë në Gjirokastër, sulme që i vijoi edhe në mediat greke. Dy ditë më vonë po i njëjti televizion transmetoi një kronikë nga Dropulli, ku pothuajse në kor gjithë banorët e fshatit diskreditonin punën e policisë./ArgjiroLajm.net
