Mes lotësh dhe dhimbjes së madhe ka folur për mediat greke dhe Mirela Ruçi, nëna e Denis Ruçit, një prej të rinjve shqiptarë të zhdukur pas aksidentit tragjik me tren në Larisa. Ajo s’ka asnjë gjurmë për djalin e saj.
“Të më tregojnë pse nuk po gjej djalin. Për një muaj kishte ditëlindjen e tij, mbush 23 vjeç. Ishte në një vagon nga i cili shpëtuan shumë fëmijë. Nuk e di nëse ishte aty në atë moment kur ndodhi përplasja apo kishte lëvizur të merrte dicka në mensë. Djali më punonte në Selanik dhe kishte ikur për tre ditë në Athinë të takonte të dashurën dhe të afërmit. Fola me të në 11 pa 10. Më tha “mama do kemi vonesë, kur të mbërrij në Selanik do të të telefonoj që të vish të më marrësh”, tregon mes lotësh, Mirela Ruci, nëna e Denis Ruçit.
Të zhdukur janë gjithashtu edhe shqiptarë të tjerë: Francesko Bezho, Klaudia Lato e Pavlin Bozo. Autoritetet greke kanë ndërprerë kërkimet pa gjetur gjurmë të dhjetra të zhdukurve. Dyshimet janë se trupat e tyre janë shkrumbuar nga zjarri i fuqishëm që shpërtheu pas përplasjes së trenave. ©argjiroja.net
