Kryetari i Bashkisë Gjirokastër, Flamur Golemi, ka emëruar një tjetër drejtues në institucionet që ka në varësi. Klodian Micka do të zëvendësojë Doriana Demon te Ndërmarrja e Trajtimit Studentor Gjirokastër. Emërimi i Mickës është bërë dy ditë më parë. Para 3 vitesh Micka ka qenë gjithashtu drejtor ALUIZNI në Gjirokastër. Në një vit drejtimi të Bashkisë Gjirokastër, duket se edhe Flamur Golemi për fat të keq, s’ka ndonjë ndryshim nga paraardhësit e vet në këtë detyrë, kur vjen fjala tek promovimi i njerëzve të rinj.
Po të shohësh sot pjesën më të madhe të drejtuesve të emëruar prej tij, janë të njëjtët njerëz që kanë shërbyer në pozicione të ngjashme edhe më parë. Kështu ndodhi me Doriana Demon apo Vangjel Muçon, dy drejtues të tjerë të emëruar para disa ditësh. Të kuptohemi, kjo nuk është fare një çështje emrash të përveçëm dhe asesi nuk jemi duke thënë se Doriana Demo, Vangjel Muço, Klodian Micka e të tjerë s’kanë të drejtë të jenë në pozicione drejtuese apo që duhet të qëndrojnë pa punë. Jo, pa punë mos pafsh as hasmin thotë një shprehje.
Problemi është përse duhet të vijojë kjo praktikë rrënuese e delegimit të punëve apo promovimit në pozicione drejtuese të një grupi të ngushtë njerëzish, a thua se vetëm ata kanë lindur për drejtorë dhe kanë talent të madh në menaxhim?! Kur janë të njëjtët njerëz që qarkullojnë nga njëri pozicion në tjetrin, të krijohet përshtypja se këtu nuk ndryshon asgjë. Për fat të keq kjo është duke ndodhur në këtë një vit edhe në Bashkinë Gjirokastër.
Me ndonjë përjashtim të vogël si nënkryetarja Jorida Muho, nuk gjen dot disa emra të tjerë të rinj që janë promovuar në pozicione drejtuese. Dhe sigurisht që vazhdimi i kësaj praktike rrënuese nuk bën gjë tjetër veçse largon njerëz drejt emigracionit apo qendrave më të mëdha urbane. Gjirokastra s’e ka luksin të humbasë njerëz e sidomos ata pak të rinj që jetojnë ende këtu apo zgjedhin të kthehen pasi përfundojnë studimet në Tiranë.
©argjirolajm.net
