Julian Ahmataj e ka nisur shumë mirë aventurën në krye të stolit të Luftëtarit, duke fituar 0-2 në Laç, një fushë shumë e vështirë. Ai ka pohuar se kjo fitore nuk është asgjë, pasi rëndësi ka vazhdimësia:
“Nuk kam bërë asgjë për kaq pak ditë që kishim në dispozicion. Sot pashë që një pjesë e mirë e lojtarëve ishin në pozita pune. Rezultatet do të jenë në varësi të asaj që ne do të shfaqim në fushën e lojës. Nuk e kemi luksin të nënvlerësojmë.
Ajo që më bëri ta marr skuadrën, është boshti i saj. I njoh shumë lojtarë, kam informacion edhe për karakterin e tyre. Mungesa ka skuadra për kualitetin, por e rëndësishme është që të bëjmë më të mirën në fushë. Ndonjëherë rezultatet janë edhe false, duhet vazhdimësi. Kjo ndeshje nuk tregon asgjë, do të shohim javët në vazhdim si do të jenë.
Pa diskutim që lojtarët ishin të motivuar. Lojtarët e rinj ndjekin lojtarët e vjetër. Kemi përdorur disa skema në këtë ndeshje, nga 4-3-3 në 4-1-4-1. Loja jonë funksionoi dhe nuk kemi pse të ndryshojmë në vazhdim. Fili dhe Xhekson? Kanë kualitet në lojën sulmuese, edhe pse nuk mbrojnë shumë mirë. Nuk kemi luksin të kemi lojtarë që të bëjnë mirë në të dyja fazat e lojës.
Kam gjetur një klub të organizuar, ndërsa për anën financiare nuk më takon të flas, pasi jam trajneri. Boshti në skuadër është, janë edhe disa djem të rinj të stërvitur shumë mirë”, – ka thënë pas ndeshjes trajneri elbasanas.
