Pavarësisht raportit negativ nga Drejtoria e Sigurimit të Informacionit të Klasifikuar si i papërshtatshëm për të vijuar detyrën, Komisioni i Pavarur i Kualifikimit konfirmoi në detyrë Julian Çafkën, drejtues në Prokurorinë pranë Gjykatës së Shkallës së Parë Gjirokastër.
Komisioni i Pavarur i Kualifikimit njoftoi sot se pas shqyrtimit të dokumentacionit dhe zhvillimit të seancës dëgjimore në datën 10 shtator për subjektin e rivlerësimit, Julian Çafka vendosi konfirmimin e tij në detyrë. Çafka gjithashtu është denoncuar disa herë në emisionet investigative për shkelje të rënda në detyrë.
Në raportin e DSIK dy prej çështjeve në të cilat ishin ngritur dyshime, kishin të bënin me hetimin e një vjedhje të mbetur në tentativë të kryer në bashkëpunim dhe një vendim pushimi të hetimit ndaj dy shtetasve të huaj për “kalim të paligjshëm të kufirit”.
Vendimi, i arsyetuar me shkrim nga trupi gjykues i kryesuar nga Etleda Çiftja, Brunilda Bekteshi relatore dhe Roland Ilia anëtar, do t’i njoftohet subjektit të rivlerësimit, Komisionerit Publik dhe vëzhguesve ndërkombëtarë brenda 30 ditëve.
Ky vendim,me përjashtim të pikës 2, mund të ankimohet në Kolegjin e Posaçëm të Apelimit nga subjekti i rivlerësimit dhe/ose Komisioneri Publik 15 ditë nga data e njoftimit të vendimit të Komisionit. Ankimi depozitohet në Komisionin e Pavarur të Kualifikimit. Me shumë gjasë vendimi do të ankimohet nga Komisioneri Publik dhe ndoshta Apeli mund të përjashtojë përfundimisht Julian Çafkën nga sistemi i drejtësisë ose ta rikonfirmojë njësoj si shkalla e parë. Mbetet të presim!
Çafka e ka filluar karrierën në Prokurorinë e Sarandës në vitin 2008. Në vitin 2013 ai është transferuar në Prokurorinë e Rrethit Gjyqësor Gjirokastër. Ai mban aktualisht funksionin e drejtuesit të Prokurorisë së Gjirokastrës. Julian Çafka heton gjithashtu dosjen e ekstremistit grek Kacifas, i cili u ekzekutua në vitin 2018 nga forcat RENEA në fshatin Bularat.
