Prokuroria e Posaçme Kundër Korrupsionit dhe Krimit të Organizuar vijon hetimet për ish-kryetaren e bashkisë së Gjirokastrës, Zamira Rami. Procesi ka nisur në korrik të vitit 2019 kur dy banorë kanë denoncuar shembjen e disa shtëpive. Pretendimi ka qenë për prishjen e godinave pa një vendim shpronësimi duke sjellë dëm të pronarëve të objekteve.
Tre ditë më parë SPAK thirri për t’u marrë në pyetje tre zyrtarë aktualë të zyrës së Urbanistikës në Bashkinë Gjirokastër, si persona që kanë dijeni për veprimet e kryera në rastin e shpronësimit. Por në pamundësi për të shkuar drejt Tiranës për shkak të masave kufizuese të pandemisë së Covid-19, tre zyrtarët njoftuan SPAK se nuk mund të paraqiteshin. Marrja e tyre në pyetje nga prokurorët që hetojnë dosjen, do të bëhet një moment tjetër pasi të lehtësohen masat dhe të lejohet qarkullimi nga njëra zonë në tjetrën.
Pas denoncimit të këtij rasti nga personat që pretentojnë se janë cënuar nga veprimet e bashkisë, Prokuroria e Gjirokastrës verifikoi të dhënat duke e dorëzuar dosjen në gjykatën e këtij qyteti me akuzën e shpërdorimit të detyrës.
Por togat e zeza vendosën të shpallin mos kompetencën për shkak të funksioneve që ka pasur Zamira Rami. Ndaj çështja i kaloi strukturës së posaçme antikorrupsion Do të jenë prokurorët e SPAK që do të hetojnë më tej çështjen për të vijuar më pas dhe me konkluzionet. Zamira Rami ka drejtuar Bashkinë e Gjirokastrës gjatë viteve 2015-2019.
©argjiroja.net
