Në Gjirokastër sot u raportuan 71 raste të reja me Covid 19, ndërsa dy ditët e fundit pati nga 3 e nga 4 raste. Kushdo shtron me të drejtë pyetjen: Pse ka kaq shumë luhatje kurba e rasteve ditore? Ne u interesuam për këtë çështje pranë autoriteteve të shëndetit publik dhe mësuam se zakonisht shifrat që raportohen janë të 3 apo më shumë ditëve. Pra, shifra 71 që është raportuar sot për Gjirokastrën iu përket datava 18, 19 dhe 20 nëntor 2020 i tha një burim Argjirolajm.net.
Ndërkohë klinikat private i nxjerrin rezultatet më herët dhe rrjedhimisht raportimi i tyre është brenda një dite. Ky është shpjegimi i luhatjes kaq të madhe të shifrave nga dita në ditë në Gjirokastër. Nëse shifrën e sotme 71 e shpërndan për 3 ditët e fundit i bien mesatarisht rreth 23 raste në ditë. Në kushtet kur jemi në valën e dytë të pandemisë dhe kur shifrat kanë kërcyer në të gjithë botën, rreth 20 raste ditore, le të themi që jemi brenda një normaliteti edhe pse Gjirokastra dikur ishte një ‘zonë e gjelbër’.
Covid 19 është i paparashikueshëm dhe në momentin kur secili prej nesh ulë disi vigjilencën në zbatimin e protokolleve të mbrojtjes, rastet e të infektuarve do të rriten. Detyra jonë e përbashkët është thjesht të respektojmë masat kufizuese e të mbajmë maskë. Në këtë mënyrë mund t’i bëjmë ballë pandemisë deri në daljen e vaksinës.
©argjiroja.net
