Çfarë ndodhi mbrëmë në Ksamil, si u ekzekutua me breshëri 48-vjeçari nga Tepelena (VIDEO)

Vrasja e pronarit të një lokali në Ksamil, Gramoz Memës, duket se ka ndodhur për larje hesapesh, sipas burimeve nga Policia. Argjirolajm.net sjell pamjet nga vendi ku ndodhi vrasja dhe të afërmit e shqetësuar të mbledhur pranë shtëpisë së tij. Katër persona dyshohet se kanë qëlluar me pistoleta në drejtim të 48-vjeçarit Mema, një breshëri plumbash së cilës ai nuk ka mundur t’i mbijetojë dhe ka humbur jetën rrugës për në spital. Krimi ndodhi mbrëmjen e së dielës, rreth orës 21:45, në Ksamil, pranë banesës së Memës. Policia e Sarandës pas ngjarjes ngriti pika kontrolli dhe vijoi krehjen e zonës gjatë gjithë natës për të bërë të mundur kapjen e autorëve. Gramoz Mema ishte me origjinë nga Tepelena. Mësohet se ai kishte qënë emigrant në Angli prej nga ishte kthyer para dhjetë vjetësh. Njihej si njeri i qetë pa probleme. Kishte lokalin dhe shtëpinë në Ksamil, që e jepte me qera gjatë verës. Po ashtu, edhe një shtëpi në Tiranë.