Edi Rama ka reaguar pasi disa përfaqësues të KiE munguan në darkën e organizuar nga vetë kryeministri në Strasburg, pas fjalimit në Asamblenë Parlamentare të Këshillit të Europës, i cili shkaktoi debat dhe tensione si rrallëherë. Në Twitter Rama shkruan se është e kuptueshme ‘kur dëgjon një histori horrori si sajesa e trafikut të organeve’ teksa shton se do ju nevojitet ‘kohë për të analizuar faktet dhe kuptuar madhësinë e gabimit.’
“Disa prej të ftuarve mbrëmë nuk erdhën në darkën e organizuar nga misioni ynë në Strasburg,megjithëse e kishin konfirmuar më parë! Nuk ndjehemi mirë pas fjalimit, ishte arsyeja. E mirëkuptueshme.S’ke si ndjehesh mirë kur dëgjon një histori horrori si sajesa e trafikut të organeve!
Bashkëbisedimi me ndonjërin syresh pas darkës ishte kuptimplotë. U ka rënë si rrufe në qiell të pastër! Do t’u duhet ca kohë për të analizuar faktet, kuptuar madhësinë e frikshme të gabimit të bërë një dekadë më parë dhe adresuar nevojën për korrigjimin e tij me një akt të ri.
Por është e neveritshme, që edhe për një padrejtësi kaq ekstreme dhe për një të drejtë kombëtare kaq legjitime, e kaq përtej politikës së ditës, e djathta jonë e nongratave dhe e rublave, gjen kurajon të kundërvihet e të merret me dokrra!#NjerëzPaAtdhe #KatranMeBojë”, shkruan Rama në Twitter.
