Kryeministri Edi Rama ka reaguar pas bllokimit të punës në aeroportin e Rinasit. Me anë të mesazhi në Twitter, kreu i qeverisë thekson se organizatorët do të kallzohen penalisht dhe do të përballen me ligjin, që ndalon rreptësisht ndërprerjen e aktivitetit të kullës nga ana e kontrollorëve.
Rama shkruan se frymëzuesit e kësaj lëvizje janë Saliu dhe Iliri, që duan mbylljen e aeroportit për të mos ardhur vaksinat!
“Sabotimi i rëndë i aktivitetit të Aeroportit “Nënë Tereza” nuk do të tolerohet!
Frymëzuesit e kësaj lëvizjeje të çartur çartiste, Saliu që gjuan me gurë digjitalë dhe Iliri, që hedh gurin e markës “Leshko” dhe fsheh dorën, duan mbylljen e aeroportit për të mos ardhur vaksinat!
Organizatorët do të kallzohen penalisht dhe do të përballen me ligjin,që ndalon rreptësisht ndërprerjen e aktivitetit të kullës nga ana e kontrollorëve!
Të tjerët duhet të vendosin menjëherë:O me shtetin në punë o me antishtetin në një proces penal për cënim të sigurisë kombëtare!‘- shkruan kreu i qeverisë.
Ndërkohë në një postim të dytë kryeministri Edi Rama akuzoi sërish presidentin Ilir Meta dhe ish-kryeministrin Sali Berisha si nxitës të pezullimit të punës së kontrollorëve në aeroportin “Nënë Tereza”.
“Humoret vulgare të IM ndërkohë që një grup i nxitur prej tij dhe Saliut, kanë kryer aktin e rëndë të bllokimit të aktivitetit të aeroportit “Nënë Tereza”, thjesht rikonfirmojnë se IM është nxitës i kësaj goditjeje të çmendur e s’ka shqiptar që s’e kupton pse! Po s’do ia dalin jo!”, shkruan Rama.
