Ornela Çuçi, zv.ministrja e Turizmit dhe Mjedisit, e cila përflitet si kandidate e mundshme e PS-së për Bashkinë Gjirokastër ka bërë një lëvizje surprizuese, të paktën për ata që besonin se ajo mund të ishte emri i zgjedhur nga Rama për qytetin e gurtë.
Sot Çuçi është ngjitur në skenë me ekipin e kryebashkiakut të Tiranës, Erion Veliaj. Ajo është pjesë e listës me 100 kandidatët e PS-së për anëtarë të Këshillit Bashkiak Tiranë. Praktikisht kjo do të thotë një lloj ‘heqje dore’ nga Gjirokastra në emër të një tjetër gare; zgjedhjen si këshilltare e PS-së në Këshillin Bashkiak të Tiranës.
Por kjo nuk është definitive, pasi në rast të një nominimi nga Edi Rama në 100 ditët e ardhshme, lehtësisht Ornela Çuçi mund refuzojë të kandidojë për Këshillin Bashkiak të Tiranës në emër të garës për Bashkinë Gjirokastër. Formalisht me atë që ndodhi sot, për momentin të paktën, Ornela Çuçi ‘bie’ si kandidaturë e mundshme e PS-së për Gjirokastrën. Megjithatë derisa listat të dorëzohen në KQZ do të rrjedhin shumë ujëra.
©argjiroja.net
