Teksa sot GJKKO vendosi që të lërë në burg Fredi Belerin, i cili akuzohet për blerje të votave, dilemë është se çfarë do të ndodhë me mandatin e tij si kryetar bashkie i Himarës.
Eksperti i kriminalistikës, Ervin Karamuço, duke u ndalur te kjo çështje thekson se nëse Beleri, nuk betohet për të marr mandatin nuk është më kryetar bashkie. Po ashtu ai tha se nëse Beleri nuk paraqitet në detyrë brenda periudhës prej tre muajsh, mund të shkarkohet menjëherë.
“Nëse ai nuk betohet për të marrë mandatin nuk është më kryetar bashkie, nëse nuk paraqitet tre muaj në detyrë menjëherë shkarkohet. Ne kemi një jurisprudencë të kryetarit të bashkisë Dibër, Shykriut në të cilën Gjykata Kushtetuese ka vendosur që edhe pse personi nuk është dënuar ende me vendim gjyqësor të formës së prerë, vendimi konkurron, sepse i lihet kompetencë me kushtetutë qeverisë, që për çdo çështje që ata gjykojnë se është shkelje flagrante e kushtetutës, mund ta shkarkojë. Lihet në fuqi edhe kjo pjesë. Shkarkimi e ka në dorë Këshilli i Ministrave jo në mënyrë të drejtpërdrejtë kryeministri.”, tha Karamuço në Top Talk.
