Luftëtari e ka arkivuar barazimin 1-1 me Laçin dhe gjirokastritët menjëherë kanë nisur përgatitjet për ndeshjen e së shtunës ndaj Vllaznisë. Në radhët e bluzinjve, optimizmi për ndeshjen e radhës është evident, pavarësisht trysnisë së rezultatit. Përpos besimit dhe dëshirës për t’u rikthyer te fitorja, për stafin teknik shqetësim më vete janë dy mungesat e lojtarëve titullarë, Behar Ramadani dhe Vangjel Zguro.
Ramadani, sipas të gjitha gjasave, pritet të jetë një mungesë me peshë në mesfushën e Luftëtarit për arsye dëmtimi. Mungesa e shkodranit përbën “dhimbje koke” për trajnerin Milinkoviç, pavarësisht alternativave që ka. E sikur të mos mjaftojë dëmtimi i Ramadanit, në takimin me Laçin e pësoi edhe Vangjel Zguro, i cili plotësoi numrin tre të kartonëve të verdhë.
Kontingjenti aktual i Luftëtarit, i vendosur nën urdhrat e stafit teknik, i ka të gjitha mundësitë për të kompensuar mungesat e titullarëve. Më herët drejtuesit e Luftëtarit janë shprehur se te gjirokastritët gjithçka funksionon si grup. Nisur nga cilësitë e bluzinjve, trajneri Milinkoviç do të dijë të rreshtojë në fushën e lojës më të mirët përballë Vllaznisë.
Afrimi i merkatos së janarit, Usama Mutumane, me shumë mundësi, shihet si zëvendësuesi real i shkodranit Ramadani nëse nuk rikuperohet për të shtunën. Një tjetër opsion është edhe Donald Rrapo. Mutumane ose Rrapo, së bashku me Albano Aleksin priten të jenë “diga” para mbrojtjes së Luftëtarit.
Sakaq, edhe pse është ende herët për të konfiguruar formacionin e mundshëm, mbrojtja do të jetë e sigurt me Liçaj, Beqiri, Bojom e Rrapaj. Sulmuesi Pedro Bengui vijon përgatitjet me grupin nën urdhrat e stafit teknik me synimin për të qenë gati për Vllazninë. Për të bërë të mundur aktivizimin sa më shpejt të sulmuesit nga Angola, ka menduar përgatitësi atletik Marko Jovanoviç.
