Në mbledhjen e fundit të Këshillit Bashkiak Gjirokastër, kryetari Flamur Golemi foli për rishikim të licencave të linjave të transportit urban në qytet. Më konkretisht ai përmendi linjën e lagjes “Dunavat”, për të cilën tha se nuk ka zbatuar kushtet e kontratës për të siguruar transportin e udhëtarëve. Sipas Golemit kjo është një kontratë e lidhur në korrik të vitit të shkuar nga paraardhësja e tij, Zamira Rami.
Ai tha se brenda shtatorit do t’i paraqesë Këshillit Bashkiak itineraret e reja dhe do të rishikohen licencat jo vetëm për lagjen “Dunavat”, por edhe për lagje të tjera. Golemi u kujdes të theksonte se kjo nuk është një luftë ndaj biznesit apo operatorëve ekzistues në treg, por bëhet në mënyrë që transporti urban i udhëtarëve të ketë vijueshmëri dhe të ofrohet një shërbim më i mirë. Kryesisht linjat e lagjeve të sipërme të qytetit përdorin mjete të amortizuara, pa ajër të kondicionuar dhe dynden me njerëz për shkak të kapaciteteve të vogla dhe orareve jo të shpeshta.
©argjiroja.net
