Monumentet në Gjirokastër kërkojnë më shumë investime, por kjo ka munguar nga shteti. Arkitekti Agron Doraci pohon se Gjirokastra ka akoma mjaft nevoja emergjente, ka objekte të rrëzuara, madje dhe të kategorisë së parë.
Sipas tij, kjo vjen si rezultat i amortizimit të madh të ndërtimeve karakteristike, mungesës së financimeve për restaurime qoftë nga shteti apo dhe privati.
Në intervistën dhënë për gazetën “Sot”, arkitekti pohon se po investohet në infrastrukturë, por urgjenca është në tjetër vend, në objektet me vlera monumentale.
Qytet i përfshirë në listën e trashëgimisë botërore të UNESCO-s, arkitekti Agron Doraci shpreh dyshimin dhe shqetësimin e tij dhe për projektin e Bypass në Gjirokastër. Më tej arkitekti flet dhe për rekomandimet e UNESCO-s, që sipas tij janë ndihmë, por dhe detyrim për qeverinë dhe për organet e specializuara shqiptare.
“Lidhur me projektin e Bajpasit shpreh dyshimin dhe shqetësimin tim. Struktura gjeologjike në këtë zonë, terreni mjaft i pjerrët, i dikton projektit struktura, me mure tepër të larta që në pamje do të jenë të dukshme. Zona ku ndërtohet ky Bajpas është pjesë e rëndësishme e peisazhit të Gjirokastrës, në të përfshihet kalaja, monumenti më i rëndësishëm i qytetit muze. Bajpasi me strukturën që ka, do të dëmtojë rëndë jo vetëm panoramën e zonës, por dhe vetë kalanë. Tradita në këtë drejtim na jep mësime të vyera, shihni rrugën ekzistuese të kalasë, bile çdo rrugë në qytetin e vjetër, nuk dallohen fare në siluet sepse nuk ka mure të larta. Këtu nuk është fjala për aftësi projektuese, karakteri i relievit dhe panorama e zonës me fizionomi arkitektonike karakteristike tashmë të formuar, pjesë e rëndësishme e së cilës është vetë kalaja, të frenon të bësh ndërhyrje në të”, shprehet Doraci.
