Këshilli Bashkiak i Gjirokastrës zhvilloi dje mbledhjen e radhës. Në fund të saj një prej anëtarëve, Armand Hila, deklaroi se do të dhurojë pagesën që përfiton si pjesë e këtij këshilli për familjet në nevojë. Ai tha se pavarësisht se është i papunë, që prej kohës kur dorëzoi detyrën e kryetarit të Këshillit të Qarkut tek Lindita Rova, do ta dhurojë pagesën deri në dhjetor 2020 pasi ende nuk dihet se sa do të zgjasë emergjenca e Covid.
Hila e argumentoi këtë gjest si shprehje të mirënjohjes për qytetarët, që siç tha ai, e kanë votuar dy mandate, i kanë dhënë tituj e grada. Gjesti i dhurimit të pagesës si anëtar këshilli, është natyrisht i lavdërueshëm dhe meriton vlerësim, por ai zvogëlohet kur Hila e përzien atë me faktin se është ende i papunë. Sigurisht që nuk është për t’u gëzuar kur merr vesh se dikush është i papunë. S’thonë kot, as hasmin mos pafsh pa punë. Por ama nuk i shkon staturës së një ish-zyrtari të lartë në nivel lokal, që të ankohet se e kanë lënë pa punë.
Mbase ky ishte një mesazh i tij, m’u aty në mexhelis, për t’u thënë socialistëve se edhe ai meriton një vend pune. Dhe nuk po e paragjykojmë fare këtë nevojë të tij e as po vëmë në diskutim nëse i takon apo jo. Ne e shohim gjetkë shqetësimin në një nivel më të gjerë sesa Armand Hila. Fakti se dikush ka qenë për arsye e rrethana nga më të ndryshmet në një pozicion drejtues për një farë kohe, nuk do të thotë domosdoshmërisht se duhet patjetër të jetë në një pozicion të ngjashëm.
Kjo praktikë, që për fat të keq ka zënë rrënjë në Shqipëri, është shkatërrimtare dhe demotivon plot të rinj që duan të kontribuojnë në administratën publike. Qarkullimi i të njëjtëve emra në pozicionet drejtuese, na fut në një rreth vicioz që të bën të kuptosh se këtu nuk ndryshon asgjë. Edhe pse ikin e vijnë kohët, prapë një rreth i ngushtë njerëzish ndajnë pozita e ofiqe me njëri-tjetrin. Për fat të keq kjo praktikë në Shqipëri duket e konsoliduar prej shumë kohësh.
Ndoshta nuk jemi para rastit që Armand Hila kërkon sërish një pozicion drejtues, që edhe po ta kërkonte është e drejtë e tij, por mbase ai thjesht do të punësohet në një vend dhe aq. E për këtë ka plot forma, që nga sektori privat, konkurset në Departamentin e Administratës Publike, emërimet me Kod Pune e deri tek regjistrimi pranë Shërbimit Kombëtar të Punësimit. Urojmë të gjejë dicka sa më shpejtë.
©argjirolajm.net
