Gjirokastra ka nisur të jetë tashmë një destinacion i rëndësishëm fundjavash për vizitorët vendas. Mes shumë vizitorëve në këtë fundjavë të parë të vitit 2021, ishte edhe ambasadori italian në vendin tonë, Fabrizio Bucci, bashkë me familjen e tij, si dhe konsullja e Italisë në Vlorë dhe zyrtarë të tjerë të përfaqësive italiane në Shqipëri. Ambasadori qëndroi dy ditë në Gjirokastër, ku krahas atraksioneve në zonën muzeale, lëvizi edhe jashtë qytetit. I shoqëruar nga kryebashkiaku, Flamur Golemi, ambasadori Bucci pa nga afër Manastirin e Spilesë me afreske mbi 400-vjeçare dhe Kishën e Shën Mërisë.
Më pas diplomati italian drekoi në një prej familjeve të fshatit Saraqinishtë, ku provoi produktet lokale dhe u njohë me praktikën e mirë të zhvillimit të turizmit familjar në këtë zonë. Më pas ambasadori dhe gjithë grupi italian shëtitën në Pazarin e Gjirokastrës, i cili këtë vit ishte zbukuruar për festa si asnjëherë më parë, duke tërhequr vëmendjen e banorëve vendas dhe vizitorëve që mbërrijnë në qytet. Kjo fundjavë e parë e këtij viti, për shkak edhe të ditëve pushim, kishte sjell në Gjirokastër shumë vizitorë.
Pjesa më e madhe e hoteleve kryesore në zonën muzeale kishin rezervime të shumta në datat 1 dhe 2 janar. Pandemia e Covid 19 goditi rëndë sektorin e turizmit gjatë këtij viti, por nxitja e turizmit vendas u pa si ‘komerdare’ shpëtimi për këtë sektor. Me lehtësimin e masave dhe nisjen e vaksinimit, pritet që ky viti i ri të jetë më i mirë për turizmin. Megjithatë Covid është i paparashikueshëm dhe është shumë herët për të folur me saktësi.
©argjiroja.net
