Një aksident me pasojë plagosjen e një 14-vjeçari ka ndodhur këtë mbrëmje në Këlcyrë. Shoferi që përplasi të miturin është larguar nga vendngjarja duke braktisur automjetin. 14-vjeçari është dërguar në spital për të marrë ndihmë mjekësore ndërsa gjendja e tij raportohet jashtë rrezikut për jetën. Sakaq, policia ka nisur hetimet për të zbardhur shkaqet dhe rrethanat e aksidentit.
Njoftimi i Policisë
Rreth orës 20:50, në rrugën rurale të fshatit Gur, Këlcyrë, mjeti tip “Opel”, me drejtues shtetasin K. J., 30 vjeç, banues në fshatin Gur, ka aksidentuar shtetasin Y. Sh., 14 vjeç.
Shtetasi K. J., pas aksidentit, është larguar nga vendi i ngjarjes duke braktisur automjetin. Shtetasi Y. Sh. po merr ndihmën mjekësore në spitalin e Këlcyrës, jashtë rrezikut për jetën.
Në vendngjarje ndodhen shërbimet e Policisë, të cilat po punojnë për kapjen e drejtuesit të automjetit dhe sqarimin e rrethanave të ngjarjes.
