Një ditë pasi e paralajmëroi në Kuvend se ish-kryeministri Sali Berisha kishte “hesape” pa mbyllur me SPAK, kreu i grupit parlamentar të Partisë Socialiste Taulant Balla, kërkon të dijë nga SPAK, se në çfarë faze janë hetimet për kallëzimin ndaj ish-kryeministrit Sali Berisha për hetimet e çështjes CEZ-DIA. Kreu i grupit parlamentar të Partisë Socialiste, Taulant Balla ka dorëzuar shkresën zyrtare ndaj Prokurorisë së Posaçme kundër Krimit të Organizuar dhe Korrupsionit, ku renditet e gjithë rruga që PS ka ndjekur për hetimin e skandalit CEZ-DIA që prej momentit kur në pushtet erdhën socialistët.
Në listën e personave që Komisioni Hetimor i PS, i ngritur në vitin 2016 mori për në hetim janë 12 persona, përfshirë edhe familjen Berisha, ish-kryeministrin, të birin, Shkëlzenin dhe Jamarbër Malltezin. E njëjta shkresë i është dërguar nga Balla edhe kreut të Prokurorisë së Përgjithshme, Olsian Çela.
‘Në lidhje me kallëzimin, nuk kemi asnjë informacion se në çfarë gjendje dhe shkalle procedimi është‘-thuhet ndër të tjera në këto shkresa të dërguara.
Afera CEZ-DIA dhe kujtesa pas “Skrapit”
Skandali për privatizimin abuziv të OSSH, me një dëm prej gati 415 milionë euro u hetua nga një komision parlamentar që u ngrit nga socialistët me të marrë pushtetin. Komisioni kallëzoi në prokurori Sali Berishën, ish-ministrat Ridvan Bode, Florion Mima, Genc Ruli, dhe disa ish-zyrtarë të tjerë si Enno Bozdo, Mimoza Vokshi, Suzana Guxhollin, Nue Nik Kalaja dhe Shtetasi çek, Josef Hejsek. Në krye të Komisionit ishte vetë Balla, por deri më sot, ende nuk ka dijeni për ecurinë e këtij kallëzimi.
Në seancën e djeshme plenare, pasi Berisha iu referua SPAK si “skrapi”, Taulant Balla u irritua duke thënë se “SPAK” ende nuk ka vepruar ndaj tij, dhe se forca e institucionit do të shihet në hetimet e dosjeve të vjetra.
