Ndërsa po afrojnë zgjedhjet parlamentare të 18 qershorit, LSI ka intensifikuar përpjekjet për të punësuar militantët e vet në Gjirokastër. Ky shqetësim është ngritur edhe në mbledhjen e Këshillit Bashkiak, nga kreu i PD-së, Roland Bejko.
Sipas tij buxheti po shpërdorohet duke shtuar vende fiktive pune në administratë, kryesisht nëpër ndërmarrjet publike që janë në varësi të Bashkisë Gjirokastër. “10 vetë i janë qepur pas një trëndafili”, tha Bejko me ironi, teksa ilustroi dhjetra vende pune të shtuara në ndërmarrjen e pastrim-gjelbërimit të Gjirokastrës. Sipas tij me këto veprime të Bashkisë Gjirokastër dhe LSI-së nuk është pajtuar as PS-ja lokale.
Ndërkohë ndërmarrjet publike që drejtohen nga njerëzit e Zamira Ramit dhe Vangjel Tavos, refuzojnë të bëjnë publike listat emërore të personave të punësuar së fundi. LSI duket e vendosur për të marrë mandatin e dytë të deputetit në Gjirokastër dhe një prej strategjive për të siguruar sa më shumë vota janë pikërisht punësimet në masë dhe kryesisht pa kriter në prag të zgjedhjeve.
Marrja e Bashkisë Gjirokastër, por edhe shumë drejtori të rëndësishme të administratës publike, i kanë dhënë LSI-së akses për të punësuar sa më shumë militantë. Sidoqoftë mbetet për t’u parë cili do të jetë rezultati i saj më 18 qershor në Gjirokastër, rezultat që do të varet shumë edhe nga fakti nëse do të dalë e vetme në zgjedhje apo me PS-në./ArgjiroLajm.net