Zv.ministja e Ministrisë së Jashtme, Artemis Dralo (Malo) ka marrë mandatin si deputete në qarkun e Gjirokastrës. Në mbledhjen e ditës së sotme, Komisioni Qendror i Zgjedhjeve i ka dhënë zëvëndëses së Gent Cakajt, mandatin e deputetes.

Në listën shumëemërore të qarkut të Gjirkostrës, Malo do të zëvëndësojë Flamur Golemin, të cilit iu besua kandidimi për bashkinë e qytetit në zgjedhjet e 30 qershorit.

Malo ishte e pesta në listën shumëemërore të PS-së në zgjedhjet e vitit 2017. Por ajo do të marrë mandatin pasi kandidati pas Golemit, Laert Duraj preferoi të mbante postin e drejtorit të Postës Shqiptare.

Deputetja e re, e cila i përket komunitetit minoritar grek, që prej tetorit të vitit 2017 ka mbajtur postin e Zëvendësministres për Evropën dhe Punët e Jashtme. Ndërsa që prej këtij muaji ajo është zgjedhur gjithashtu edhe Anëtare e Asamblesë së Partisë Socialiste të Shqipërisë.

Vendimi

Tiranë më 21.05.2019

Komisioni Qendror i Zgjedhjeve, në mbledhjen e ditës së sotme shqyrtoi projektvendimet:

1. “Për dhënien e mandatit të deputetit të Kuvendit të Shqipërisë, kandidatit të listës shumemërore të Partisë Socialiste, Qarku Gjirokastër, për plotësimin e vakancës së njoftuar nga Kuvendi i Shqipërisë.”

KQZ vendosi t’i japë mandatin e deputetit të Kuvendit të Republikës së Shqipërisë, kandidatit të radhës në listën shumemërore të Partisë Socialiste, Qarku Gjirokastër, znj. Artemis Kosta Dralo (Malo)