Në Gjirokastër është përkujtuar sot 75 vjetori i ekzekutimit makabër me varje të dy heroinave, Bule Naipi dhe Persefoni Kokëdhima.
Ato u varën në litarë në sheshin “Çerçiz Topulli” më 17 korrik 1944 prej dorës gjakatare të Gestapos gjermane e ballistëve të përfaqësuar nga Idri Jazo, Komandant i Xhandarmërisë së Gjirokastrës, Veip Runa prefekt i Gjirokastrës, Ahmet Niviça e Xhafer Leskoviku që spiunuan kapjen dhe ekzekutimin e tyre. Ishin dy vajza të reja nga mosha por vigane nga shpirti e qëndresa.
Në ceremoninë e organizuar sot në Gjirokastër ishin të pranishëm kryebashkiakja në detyrë, Zamira Rami, kryebashkiaku i zgjedhur, Flamur Golemi, prefekti Astrit Aliaj dhe kreu i Këshillit të Qarkut, Armand Hila.
Kjo është hera e parë që Rami e Golemi shfaqen së bashku pas zgjedhjeve të 30 qershorit. Ende nuk dihet nëse do të ketë një ceremoni për kalimin e detyrës së kryebashkiakut në ditët e ardhshme. Dje Gjykata e Gjirokastrës dha vendimin për vlefshmërinë e mandatit të Flamur Golemit. Pritet ndërkohë të shprehet Kolegji Zgjedhor për cështjen e Këshillit Bashkiak.