Flamur Golemi vijon ndryshimet në Bashkinë Gjirokastër. Një tjetër drejtues nga radhët e njerëzve të besuar të ish-kryebashkiakes, Zamira Rami është spostuar nga kryetari i ri. Armand Mamani, drejtori i Agjencisë së Mirëqënies dhe Kujdesit Social është pezulluar nga detyra pas një auditi të brendshëm të kryer në institucionin që ai drejtonte.
Burimet thonë se Mamani është gjetur me shkelje të rënda. Sidoqoftë përmbajtja e plotë e raportit të auditit nuk dihet ende. Në vend të tij tek kjo drejtori është komanduar përkohësisht një vartëse e tij. Armand Mamani nisi punë në bashki pas shkarkimit si drejtues i spitalit rajonal ‘Omer Nishani’.
Një raport auditi i kryer nga Ministria e Shëndetësisë në atë kohë konstatoi se Mamani kishte abuzuar me fondet publike të spitalit. Gjatë periudhës që ishte në bashki ai mbahet mend si një prej njerëzve më të besuar të Zamira Ramit, ndoshta dhe për shkak të lidhjeve fisnore që kishte me ish kryebashkiaken, por edhe për faktin se agjencia e tij qarkullonte miliona lekë tendera.
Armand Mamani do të mbahet mend edhe si drejtori që u mblidhte lekë prindërve e nxënësve për të lyer shkollat e kopshtet dhe për të blerë tapete, pavarësisht se ata paguanin taksa në bashki; do të mbahet mend edhe si drejtori që u hoqi kopshteve ushqimin gjatë verës dhe më pas rriti tarifën ditore.
Pezullimi i tij nga detyra është thjesht një hap larg shkarkimit dhe Mamani e di mirë këtë gjë. Afërmendsh që ky proces do të vijojë edhe me drejtues të tjerë në ditët e ardhshme, drejtues të cilët janë emëruar politikisht dhe kanë patur një angazhim partiak në radhët e LSI-së apo PD-së. Të vetmet që do t’i shpëtojnë ‘furtunës’ janë gratë e vajzat. Të paktën ky ishte zotimi publik i Edi Ramës dhe porosia e tij për kryebashkiakët e vet.
©argjiroja.net
