Një zjarr i përmasave të konsiderueshme ka përfshirë një sipërfaqe të madhe me kullotë në zonat mes Dervicianit dhe Goranxisë në Dropull të Gjirokastrës.
Mësohet se 2 ha kullotë është djegur, ndërsa flakët kanë prekur edhe rreth 50 pisha. Dy makina zjarrfikëse kanë shkuar në terren. Po punohet edhe me mjete rrethanore si pasojë e terrenit malor.
Operacioni drejtohet nga kreu i PMNZSH Gjirokastër Kujtim Bizhga dhe prefekti Aliaj. Zjarri po përhapet me shpejtësi. Është bërë rrethimi për të mos u përhapur afër banesave.
Zjarret në Dropull, janë problematikë e përvitshme. Këtë vit përgjatë korrikut në Gjirokastër u regjistruan vetëm 4 vatra zjarri, ndërsa kjo është vatra e dytë e zjarrit në Dropull brenda harkut kohor të një jave.
Viti 2017 shënoi edhe bilancin më dramatik të dy dekadave të fundit në Gjirokastër, ku në të gjithë qarkun u dogjën më shumë se 700 ha kullota dhe pyje. Gjatë 2018 në Gjirokastër u shënuan 80 vatra zjarri.
