Në Lazarat do të nisë vitin e ardhshëm investimi për ujësjellësin e ri të fshatit. Lajmin e bën me dije kryebashkiaku i Gjirokastrës, Flamur Golemi teksa publikon në faqen e tij në Facebook disa foto nga dëgjesat publike për buxhetin e ri.
“Gjatë takimit në Lazarat, ndava me të pranishmit aty, një lajm të mirë që dua ta përsëris edhe këtu. Bëhemi gati të investojmë në ujësjellësin e këtij fshati, për t’i dhënë fund njëherë e mirë problemit që askush më parë nuk tentoi t’i qasej”, shkruan Golemi, por pa dhënë më tepër detaje rreth investimit, vlerës, datës së saktë se kur do të fillojë dhe kush e financon.
Një detaj interesant nga dëgjesa publike në Lazarat është se ajo u zhvillua në zyrat e ish-komunës. Flamur Golemi ishte ulur pikërisht në karrigen ku qëndroi për më shumë se një dekadë ish-krytari Dasho Aliko.
©argjirolajm.net
