Me emërimin e drejtorit të ri, Televizioni publik Gjirokastra ka ndryshuar edhe linjën editoriale. Normal që s’ka dalë kundër qeverisë. S’ka se si kjo të ndodhë, por ka shtuar dozën e kritikave ndaj Bashkisë Gjirokastër. Vetëm në edicionin e sotëm të lajmeve me rreth 10 kronika, 4 shigjetonin Zamira Ramin dhe punën e saj në drejtimin e bashkisë. Së pari ishte një kronikë për mungesë infrastrukture në lagjen pranë Viroit, së dyti një kronikë e ngjashme për lagjen ‘Zinxhira’, së treti problemi i ujërave të zeza në ‘Palorto’ dhe në fund diçka për liceun artistik të Gjirokastrës.
Fshikullimi i bashkisë nis që në strishat e kronikës, më pas në tekstin e gazetares dhe natyrisht në sinkronet e përzgjedhura. Normal që kjo nuk është e rastësishme. Jemi në fushatë dhe synimi është të goditet Zamira Rami edhe pse ajo i ka mbyllur hesapet me Bashkinë Gjirokastër. Tani thjesht po vijon ditët e mbetura të mandatit dhe po bën qokat e fundit që ka në dorë si kryebashkiake.
Po kështu synohet të goditet edhe modeli i LSI-së në pushtetin vendor. Për ironi të fatit pas këtyre sulmeve qëndron personi që dikur i bënte promo Zamira Ramit përmes Alpo Tv, media e marrë me qira nga familja Tavo rreth 3 vite më parë në funksion të propagandës së LSI-së. Por kohët sot kanë ndryshuar. Arian Xhani që dikur promovonte Zamira Ramin, mbase jo nga dëshira e tij, por sepse ajo ishte linja editoriale e Vangjel Tavos në Alpo Televizion, sot dëshmon se kryebashkiakja ka qenë e paaftë për të menaxhuar Gjirokastrën. Natyrisht që s’jemi duke mohuar problematikën që shtrohet në kronikat e Tv Gjirokastra dhe as duke lavdëruar punën e Zamira Ramit.
Madje po të thellohesh ca më shumë gjen plot dështime të tjera. Ama t’i drejtosh shigjetat kundër saj pikërisht në këtë moment kur ajo ka dalë jashtë loje, ky shërbim ndaj PS-së dhe kandidatit Flamur Golemi, nuk është fort i përligjur. Nëse do të ishin rrethana të tjera, kur Zamira Rami do të garonte përballë Golemit, mund t’ia tundje si fletërrufe dështimet e saj. Por ajo zgjodhi të largohej nga ‘fushë-beteja’ duke konfirmuar në këtë mënyrë se në 2015 ia dhuruan mandatin.
Po të mos qe kështu, sot Zamira Rami do të ishte në garë për të mbrojtur punën e saj në Bashkinë Gjirokastër, për të vijuar projektin e saj për qytetin dhe natyrisht për të mos ‘prerë në besë’ ata që besuan dhe ende besojnë tek ajo. Në këtë kuptim, të merresh sot me bilancin e Zamira Ramit e të vazhdosh ta sulmosh, është njësoj si të bësh luftë me mullinjtë e erës. Lereni të qetë Zamira Ramin, të mbarojë mandatin kushtetues dhe ta dorëzojë tek Flamur Golemi, nëse ky i fundit do të zgjidhet kryebashkiak i Gjirokastrës. Siç thotë edhe Edi Rama, koha politike dhe koha fizike deri më 30 qershor nuk janë e njëjta gjë.
©argjiroja.net