Një ditë më parë emisioni ‘Stop’ në Tv Klan denoncoi skandalin me makaronat e skaduara që tregtoheshin në vend. Në rrjetin e subjekteve që shisnin këto makarona ishte edhe ‘Vaka Treg’ Sh.p.k në Gjirokastër, të cilës iu bllokua një magazinë me 18 tonë makarona të skaduara. Disi i çuditshëm është fakti se si kjo ngjarje e rëndë, kaloi në heshtje nga tre televizionet lokale; Tv Gjirokastra, Alpo Tv dhe Channel 7. Në edicionin e sotëm informativ të këtyre tre televizioneve nuk kishte asnjë kronikë, asnjë informacion qoftë dhe në mënyrë telegrafike për çfarë kishte ndodhur. Në fakt do duhej të ishte e kundërta.
Media, pavarësisht lirisë së vet për një linjë të caktuar editoriale, kur vjen puna tek siguria ushqimore apo çështje të tjera sensitive, duhet të reagojë në bllok. Të denoncojë me ashpërsi dhe të ushtrojë presionin e vet ndaj institucioneve që kanë përgjegjësi për sigurinë ushqimore. Magazina me 18 tonë makarona të skaduara që shiteshin në Gjirokastër, është në kufijtë e një genocidi që i është bërë konsumatorëve. Mendoni sa e sa njerëz kanë konsumuar prej atyre makaronave, mendoni fëmijët, nipat apo mbesat tuaja nëpër çerdhe e kopshte.
E nëse ky skandal nuk do të ishte zbuluar nga media, ato makarona do të vazhdonin të shiteshin nëpër dyqanet e Gjirokastrës dhe rrethinave. Skandaleve të tilla, pavarësisht se kush i denoncon fillimisht, çdo media tjetër duhet t’i bëjë jehonë për të rritur presionin ndaj institucioneve përgjegjëse, por edhe për të ndërgjegjësuar konsumatorët. Heshtja e tre televizioneve lokale sot në Gjirokastër ishte një rast i humbur dhe që të le shije të keqe.
© ArgjiroLajm.net
