Luftëtari po vazhdon me përgatitjet në kuadër të debutimit absolut në Ligën e Europës, ku përballë do të ketë një kundërshtar modest si Ventspilsi. Duke parë largimin e Abazajt, por edhe të Bregut pas Europës, drejtuesit gjirokastrit kanë nisur të mendojnë për lojtarët e sezonit të ardhshëm. 

Së fundmi, me skuadrën është bashkuar një shqiptar nga kampionati grek. Donaldo Acka është përforcimi i radhës te gjirokastritët, ndërkohë që vjen nga skuadra e Karaiskakisit. Këtë sezon, Acka është aktivizuar vetëm në dy takime me skuadrën e tij.

Ai është 20 vjeç dhe luan si mesfushor, ndërkohë që këtë sezon, e mbylli me skuadrën e tij në vendin e 8 të Ligës së Dytë greke. Luftëtari mund të jetë një trampolinë për 20-vjeçarin, i cili ka mundësinë e artë për t’u bërë një lojtari njohur dhe pse jo për të pretenduar një vend në Kombëtare.