Ksenofon Krisafi është nderuar sot me titullin “Qytetar Nderi” i Gjirokastrës. Titulli i është dorëzuar përmes një ceremonie nga kryebashkiaku Flamur Golemi.
“Një titull i vonuar, por plotësisht i merituar për Prof.Dr. Ksenofon Krisafin. Një gjirokastrit i mirë, jurist i shkëlqyer, intelektual dhe mbrojtës i flaktë i interesit kombëtar. Kënaqësi që sot t’i dorëzoja titullin “Qytetar Nderi” i Gjirokastrës. Në një formë apo në një tjetër, personalitete si Ksenofon Krisafi i janë gjendur në çdo kohë Gjirokastrës, kanë ditur të lartësojnë emrin dhe vlerat e këtij qyteti, si dhe të japin kontribute domethënëse”, shkruan Golemi në Facebook.
Ksenofon Krisafi është njeriu që kryesoi negociatat me Italinë për kufirin detar si një prej ekspertëve më të mirë të së drejtës ndërkombëtare. Po kështu ai ka qenë një ndër kundërshtuesit më të mëdhenj të paktit detar të 2009-s me Greqinë, i nënshkruar nga Lulzim Basha e Sali Berisha. Madje ai ishte ndër personat që inicio dërgimin në Gjykatën Kushtetuese të kësaj cështje bashkë me juristët e PS-së, marrëveshje që më vonë u rrëzua me një vendim 5 me 0. Ksenofon Krisafi u caktua në vitin 2018 krye të grupit të ri negociator të marrëveshjes për ndarjen e kufirit detar me Greqinë. Kjo marrëveshje nuk është finalizuar ende nga të dy vendet.
©argjirolajm.net
