Luftëtari pësoi dje një nga humbjet më të thella në vitet e fundit në kampionat, duke u mundur me rezultatin 1-5 nga Kastrioti. Kjo humbje, erdhi në vazhdën e një krize rezultatesh dhe jo vetëm, ndërkohë që tashmë ka edhe të tjera probleme për bluzinjtë.  

Trajneri Gentian Mezani ka dhënë dorëheqjen nga Luftëtari për shkak të problemeve të shumta që kanë kapluar kampin gjirokastrit. Mezani u bë trajner i Luftëtarit në mesin e fazës së parë, ku skuadra numëronte vetëm humbje në epokën e teknikut Kostiç.

Me disa rezultate pozitive të arritura në kampionat, bluzinjtë nisën të shpresonin për mbijetesë por problemet e shumta duket se e kanë thyer këtë shpresë të fundit. Largimet e Shkurtajt, Rrocës dhe Milosljaevit e bënë më të vështirë objektivin që Luftëtari kishte dhe tashmë, duhet të gjejë edhe një trajner të ri.

“Nuk ka fjalë për këtë humbje, por dua t’i bëj komplimente kundërshtarit. Treguan forcë dhe karakter. Ne nuk kemi cilësi dhe dëshirë në fushë. Edhe gabimet individuale ndikuan. Unë kam kaq kohë që flas me drejtuesit, por me keqardhje mund të them se nuk kemi skuadër për Superligë. Fjalët e mia kanë kaluar në vesh të shurdhët”, u shpreh Mezani për ‘Supersport’.