Skënderbeu fillon për gatitjet pa humbur kohë për sezonin e ri futbollistik. Pavarësisht dilemave të shumta që kanë korçarët për sa i përket vendimit që pritet të marrë KAS, kjo nuk i ka penguar drejtuesit për të hedhur themelet e para. Në raport me paraqitjen e këtij sezoni që la mjaft për të dëshiruar, bardhekuqtë duket se do t’i kushtojnë më shumë rëndësi rindërtimit të ekipit të ri, duke afruar disa lojtarë të rëndësishëm në pozicione kyçe. “Panorama Sport” zbuloi dje ekskluzivisht se më afër Skënderbeut janë dy lojtarët më të mirë të Luftëtarit, Albano Aleksi dhe Behar Ramadani.
Të dy mesfushorët që prej katër vitesh luajnë së bashku në ekipin gjirokastrit nuk kanë më kontratë me klubin e Luftëtarit dhe kësisoj në ndryshim nga ajo që ka ndodhur me Abazajn dhe Bregun, rruga e korçarëve është e hapur.
ALEKSI – I pari që është kontaktuar nga Skënderbeu ka qenë mesfushori Albano Aleksi. Lojtari fierak ka tri sezone radhazi që luan në Superiore me fanellën bluzi, duke qenë ndër më të mirët në rolin e tij në kampionatin shqiptar.
25-vjeçari shikohet nga trajneri Orges Shehi si njeriu i duhur për të bërë lidhjen mes repartit të mesfushës dhe sulmit. Klubi korçar ka mbajtur kontakte me mesfushorin në muajt e fundit, duke i garantuar një kontratë joshëse, por palët mund të futeshin në bisedime konkrete vetëm atëherë kur Aleksi të mbyllte marrëveshjen me gjirokastritët.
Gazeta mëson se palët parimisht kanë rënë dakord për këtë transferim, teksa mbetet vetëm hedhja e firmës në kontratë, që do të vonojë disi, pasi gjërat janë të lidhura me vendimin që do të marrë KAS për të ardhmen e klubit bardhekuq.
RAMADANI – Një tjetër dëshirë e Skënderbeut, po në të njëjtin repart është edhe shkodrani Ramadani. Mesfushori shkatërrues që mban edhe shiritin e kapitenit të Luftëtarit, ka një rol kyç te gjirokastritët prej vitesh, ndërsa ka provuar të luajë në Superiore edhe me Vllazninë.
29-vjeçari formon dyshen perfekte me Aleksin në mesfushë, dy lojtarë, të cilët plotësojnë njëri-tjetrin. Jo më kot Luftëtari me ata në fushë në sezonet e fundit ka pasur një garanci të madhe. Duke parë që Ramadani del i lirë ashtu si Aleksi, pra i skadon kontrata me bluzinjtë, Skënderbeu e ka ndoshta më të lehtë për ta bindur. Gjithsesi, duhet pritur disa ditë për të qartësuar situatën.
