Në një sezon që po shkon drejt fundit, skuadrat e Superligës shqiptare kanë nisur t’i japin dorën e fundit arritjes së objektivave të vendosur në fillim të edicionit.
Një prej skuadrave që është shumë larg pritshmërive është Tirana, me bardheblutë që erdhën në elitë me synimin e vetëm Kupat e Europës. Por, kur kanë kaluar 30 javë, kryeqytetasit janë në garë për të qëndruar në Superiore, teksa mbajnë vendin e 3-të nga fundi.
E për këtë fakt, duke pasur parasysh se këtë fundjavë kanë edhe një takim delikat si ai ndaj Luftëtarit, grupimi i tifozëve bardheblu, “Tirona Fanatics” kanë nisur përgatitjet për këtë transfertë. Përmes një statusi në rrjetin social, grupimi e konsideron të dielën e 28 prillit si bardheblu dhe që i përket vetëm atyre.
Njoftimi i plotë:
“Të gjithë drejt Gjirokastres!
Të dielën, Tirona luan ndoshta ndeshjen më të veshtirë dhe vendimtare të sezonit, perballë Luftëtarit ne Gjirokastër!
3 PIKËT JANË DETYRIM!
Ti tregojme te gjitheve ashtu sic i kemi treguar per sezone me rradhe qe Tirona nuk eshte mall pa zot!
Tirona na ka ne, Tirona ka Fanatics!
Lajmëroni shok gjatë gjithë javës, e diela është bardheblu, i përket Tironës e na con te gjithëve drejt jugut, drejt Gjirokastrës…
VETËM PËR EMRIN E MODH TE TIRONËS!
#Shperndaje
*Detajet e transfertes do te publikohen ne nje njoftim te dyte..
TF”-shkruhet në statusin e grupimit.